Kriza e cmimeve të energjisë në bursat e huaja e ka detyruar qeverinë që të mbuloj me plot 200 milion euro, garanci financiare arkat e OSHEE. Dhe në mes të kësaj krize ku qytetarët duhet të shtrëngojnë rripin dhe ku buxheti i shtetit duhet të bëjë manovra për të gjetur 100 milion euro këtë vit dhe 100 milion euro të tjera në fillim të 2022, skandalet me abuzimet me tenderat e rrugëve vazhdojnë.
Ministria e Infrastrukturës ka shpallur si fitues të tenderit për ndërtimin e tunelit të Llogarasë, një bashkim kompanish turk, i cili as më shumë dhe as më pak, ka ofruar rreth 12 milion dollarë më shumë se oferta më e mirë. Sipas dokumenteve që News24 disponon.
Tenderi kishte njëfond limit prej 18,9 miliard lekë. Nga pesë pjesëmarres, fitues u shpall bashkimi i operatorëve ekonomikë INTEKAR YAPI dhe ASL që kërkoi ta ndërtojë tunelin për rreth 17 miliard lekë ose 170 milion dollarë. Tre ofertues të tjerë kërkuan më shumë para, por ndërkohë një tjetër bashkim operatorësh, përbërë kompania egjiptiane Concord Engineering dhe dy kompani shqiptare po, Alb Building dhe Alb Star, ka ofruar 12 milion dollarë më pak për të njëjtën punë, në total rreth 15,8 miliardë lekë ose 158 milion dollarë. Por edhe pse sipas ligjeve shqiptare oferta më e mirë financiare në prokurimet publike ka përparësi, sidomos kur bëhet fjalë për ndërtim rrugësh, ministria e Infrastrukturës ka gjetur justifikime për ta rrëzuar propozimin 12 milion dollarë më pak.
