Fotografia me imazhin e Enver Hozhës që deputeti socialist Bujar Çela zgjodhi të uronte kolegët e Komisionit të Sigurisë për festat e Nëntorit, ka krijuar një reagim të ashpër jo vetëm nga radhët e deputetëve të Partisë Demokratike, por edhe më gjerë.
Por pavarësisht reagimeve të shumta vetë ligjvënësi socialist nuk është tërhequr nga deklarata e tij.
Çela përmes një interviste të dhënë nga Lushnja shprehet se ai e njeh luftën nacional-çlirimtare dhe udhëheqësin e saj, i cili është sipas tij Enver Hoxha.
Deputeti thekson gjithashtu se shqiptarët nuk mund ta fshijnë historinë nga kanë ardhur si komb.
Intervista:
Figura e Enver Hoxhës ka kuptim në festa të tilla?
Unë pres pyetje të tilla. Përderisa unë jam këtu unë i përkas atyre që e njohin luftën dhe mendojnë se figura e Enver Hoxhës nuk mund të quhet nul, ka dhe ai kontribute në luftë, përderisa ne nuk kemi nxjerrë një udhëheqës tjetër që e ka udhëhequr këtë luftë. Po të jetë se ka një udhëheqës tjetër që pretendon se gjyshi stërgjyshi e ka udhëhequr këtë luftë, të shprehet historianët janë aty, letrat janë aty. Shumë herë kemi bërë padrejtësisht armiq dhe kriminela, dhe pastaj kemi reduktuar. Këto fakte janë nga më të ndryshme që nga Balli Kombëtar, Legaliteti, të cilët armiq pastaj janë rreshtuar në kampin fitues mbi nazi-fashistin.
Çfarë mund t’i thoni deputetëve të tjerë në komision që reaguan?
Kjo pyetja është brenda atij komisioni, në atë komision ka njerëz që janë njerëz të Isa Toskës, unë nuk jam nip i Enver hoxhës, por jam si të gjithë shqiptarët që nuk mund ta fshijnë historinë nga kemi ardhur ne si komb.
Por kujtojmë se ndryshe nga sa deklaron deputeti Çela, i cili nuk e mohon autorësinë mesazheve, Kreu i Grupit Socialist Taulant Balla, deklaroi ditën e sotme se deputetit i është vjedhur telefoni dhe se nuk ka qenë ai që i ka dërguar ato mesazhe.
LEXO EDHE👇
https://www.kavaja.net/2021/11/zbardhen-sms-te-provokoi-me-foton-e.html?m=1
Urimi i pazakonte në grupin e “Whatsapp” të Komisionit të Sigurisë, me portretin e Enver Hoxhës nga ana e deputetit socialist, Bujar Çela ka sjellë reagime të shumta nga radhët e politikës.
Kryetari i grupit parlamentar i PS-së, Taulant Balla thotë se ka marrë një sqarim nga deputeti, që sipas tij i është përdorur telefoni nga dikush tjetër.
Sipas, Ballës sjellja e deputetit socialist është duke u verifikuar në aspektin e kodit të sjelljes dhe etikës brenda grupit parlamentar dhe se do të këtë masë disiplinore sapo situata të sqarohet.
Balla nga ana e tij ftoi të gjithë deputetët që të raportojnë raste të tilla, pasi siç thotë ai PS ka të gjithë instrumentet e nevojshme për të ndërmarrë çdo lloj hapi apo mase disiplinore.
“Unë kam marrë një sqarim nga deputeti në fjalë, që bëhet fjalë për përdorim të aparatit të tij celular nga persona të tjerë. Kjo do të jetë pjesë e një verifikimi në aspektin e kodit të sjelljes dhe etikës brenda grupit parlamentar dhe çdo masë ndëshkimore do të merret në momentin që do të ketë verifikime. Do i kërkoja të gjithë kolegëve të tjerë të raportojnë raste të tilla dhe natyrshëm që grupi parlamentar i PS ka të gjithë instrumentet e nevojshme për të ndërmarrë çdo lloj hapi apo mase disiplinore”, tha Balla nga Fieri.
